İsrail "Hizbullah"ın obyektlərinə hava zərbələri endirib

İsrail Hərbi Hava Qüvvələri Livanda "Hizbullah"ın atıcı qurğularının yerləşdiyi hərbi obyektlərə zərbələr endirib.

“Report” xəbər verir ki, bu barədə İsrail Ordusunun mətbuat xidməti məlumat yayıb.

Məlumatda bildirilir ki, bu obyektlərdə terror fəaliyyəti İsrail və Livan arasında atəşkəs razılaşmalarının pozulmasıdır.

"Ordu İsrail dövlətinə qarşı hər hansı təhlükəni aradan qaldırmaq və "Hizbullah"ın öz qüvvələrini yenidən silahlandırmaq cəhdinin qarşısını almaq üçün hərəkətdədir", - yayılan açıqlamada deyilir.