Hyustonda şənlikdə atışma nəticəsində iki yeniyetmə həlak olub

ABŞ-də Texas ştatının Hyuston şəhərində şənlik zamanı baş verən atışma nəticəsində ən azı iki yeniyetmə ölüb, dörd nəfər yaralanıb.

"Report"un məlumatına görə, bu barədə "Associated Press" yerli polisə istinadən məlumat yayıb.

Qeyd olunub ki, naməlum şəxs ziyafətə atəş açıb. Nəticədə 16 yaşlı yeniyetmə hadisə yerində, 14 yaşlı qız isə xəstəxanada keçinib.

Xəsarət alan 4 nəfərin xəstəxanada müalicəsi davam etdirilir. Zərərçəkənlərdən birinin vəziyyətinin ağır olduğu qeyd edilir.

Polis araşdırmaları davam etdirir, lakin cinayəti törədənin motivi və kimliyi barədə heç bir məlumat verilmir.