Hindistan DİN: Dehlidə partlayış zamanı səkkiz nəfər ölüb - YENİLƏNİB-2

Dehlidə avtomobilin partlaması nəticəsində səkkiz nəfər ölüb.

"Report"un yerli mediaya istinadən məlumatına görə, bu barədə Hindistanın daxili işlər naziri Amit Şah bildirib.

"Bu gün saat 19:00 radələrində (Bakı vaxtı ilə 17:30 - red.) Dehlidə Qırmızı Qala yaxınlığında "Hyundai i20" markalı avtomobildə partlayış baş verib. Xəstəxanadan alınan məlumata görə, indiyə qədər səkkiz nəfər ölüb", - o bildirib.

Nazir partlayış yerinə baş çəkib. O, nazirliyinin yüksək vəzifəli şəxslərinin noyabrın 11-də iclasının keçiriləcəyini açıqlayıb.

Daha əvvəl NDTV telekanalı partlayışda 13 nəfərin öldüyünü, 20-dən çox insanın yaralandığını bildirib. Telekanal partlayan avtomobilin ilk sahibinin həbs olunduğunu bildirib. Onun satdığı avtomobilin sahibinin partlayışda öldüyü güman edilir.

20:13

Hindistanın Dehli şəhərində baş verən partlaşışda ölənlərin sayı 13 nəfərə çatıb

"Report" xəbər verir ki, bu barədə NDTV telekanalına Dehli polisinin komissarı Satiş Qolç bildirib.

O, qeyd edib ki, "Hyundai I20" avtomobilində baş verən partlayış nəticəsində 13 nəfər ölüb, daha 24 nəfər yaralanıb. Hadisə zamanı nəqliyyat vasitəsində sürücü və sərnişinlər olub. Avtomobil işıqforda dayanıb, bu vaxt partlayş olub və yaxınlıqdakı digər 22 nəqliyyat vasitəsinə zərər dəyib.

Təhqiqata Hindistanın terrorizmə qarşı mübarizə üzrə aparıcı qurumu Milli İstintaq Agentliyi və Milli Təhlükəsizlik Agentliyi qoşulub.

19:38

Hindistanın Dehli şəhərində avtomobildə baş verən partlayış nəticəsində səkkiz nəfər həyatını itirib, 24 nəfər isə xəsarət alıb.

"Report" NDTV-yə istinadən xəbər verir ki, hadisə metrostansiyasının yaxınlığında qeydə alınıb.

Dehli polisi güclü partlayışın olması barədə məlumat yayıb.

Hadisə yerinə təxminən 20 yanğınsöndürən maşın göndərilib, polis ərazini tam mühasirəyə alıb. Bu bölgə ilboyu turistlərin sıx ziyarət etdiyi məkanlardan biridir. Yeni Dehlidə yüksək hazırlıq rejimi elan olunub.

Partlayışın səbəbi hələlik məlum deyil.