Bayden Floridada qasırğa ilə əlaqədar fövqəladə vəziyyət elan edib

ABŞ Prezidenti Cozef Bayden ştata yaxınlaşan Milton qasırğası ilə əlaqədar Floridada fövqəladə vəziyyət elan edilməsi haqqında sərəncam imzalayıb.

“Report”un məlumatına görə, bu barədə Ağ Evin mətbuat xidməti məlumat yayıb.

Amerika prezidentinin sərəncamı Florida hakimiyyətinə ABŞ Daxili Təhlükəsizlik Departamenti və Federal Fövqəladə Halların İdarə Olunması Agentliyinin köməyini nəzərdə tutur.

Saffir-Simpson şkalası üzrə beşinci kateqoriyaya qədər güclənən qasırğanın çərşənbə günü və ya cümə axşamı günü Florida sahillərinə yaxınlaşacağı gözlənilir. Mütəxəssislərin hesablamalarına görə, Milton Floridanın qərb sahillərinə, o cümlədən Tampa körfəzinə hündürlüyü 3 metrdən çox olan dağıdıcı dalğalar gətirəcək.