Aİ liderləri Rusiyanın dondurulmuş aktivlərinin istifadəsi mexanizmini təsdiqləməyiblər

Avropa İttifaqının (Aİ) 27 ölkəsinin liderləri Rusiyanın dondurulmuş aktivlərindən istifadə ilə bağlı Avropa Komissiyasının (AK) təklif etdiyi mexanizmə diqqət yetirib, lakin bunu təsdiqləməyib.

“Report” xəbər verir ki, bu barədə Aİ-nin Ukrayna üzrə sammitinin yekun bəyanatında qeyd olunub.

“Avropa Şurası qüvvədə olan müqavilə öhdəliklərinə, Avropa və beynəlxalq hüquqa uyğun olaraq partnyorlarla koordinasiyada Rusiyanın immobilizasiya edilmiş aktivlərindən birbaşa əldə edilən özəl şirkətlərin mənfəətinin Ukraynanın bərpası və yenidən qurulmasına dəstək üçün necə istifadə oluna biləcəyi ilə bağlı qəti irəliləyişə çağırışını təkrarlayır. Bu kontekstdə Avropa Şurası Rusiyanın dondurulmuş aktivlərindən əldə edilən gəlirlərin istifadəsi ilə bağlı son təklifləri nəzərə alır”, - sənəddə deyilir.

Dekabrın 12-də Avropa Komissiyası Aİ ölkələrinə Rusiya Federasiyasının dondurulmuş aktivlərindən əldə edilən gəlirlərdən istifadə mexanizmini təqdim etdiyini açıqlayıb. Mexanizmin qüvvəyə minməsi üçün Aİ ölkələrinin sənədi təsdiqləməsi vacibdir.