ABŞ Fələstin – İsrail münaqişəsində üçüncü tərəflərin iştirak ehtimalını yüksək görmür

ABŞ hökuməti hazırda üçüncü tərəflərin Fələstin – İsrail münaqişəsinə müdaxilə etməyə hazırlaşdığına dair heç bir dəlil görmür.

“Report” xəbər verir ki, bu barədə Ağ evdə Milli Təhlükəsizlik Şurasının strateji kommunikasiyalar üzrə əlaqələndiricisi Con Kirbi brifinqdə bildirib.

Tədbir zamanı jurnalistlər Vaşinqtonun üçüncü qüvvələrin hərbi əməliyyatlara cəlb olunmasının qabaqlanması üçün tədbirlər görüb-görmədiyini soruşublar. Söhbət xüsusən İran və ya Livanın “Hizbullah” hərəkatından gedib.

“Hazırkı mərhələdə biz kənar oyunçulardan heç birinin bu münaqişəyə müdaxilə etmək və ya onun əhatə dairəsini genişləndirmək istəyi və ya hazırlığını ifadə etdiyini görmürük”, – Kirbi vurğulayıb.