ABŞ-də yağan güclü yağışlar nəticəsində azı 9 nəfər ölüb

ABŞ-nin Corciya və Kentukki ştatlarında yağan güclü yağışlar nəticəsində azı 9 nəfər ölüb.

“Report” xəbər verir ki, bu barədə CNN televiziya şirkəti məlumat yayıb.

Təbii fəlakət nəticəsində 8 nəfər Kentukki, 1 nəfər Corciya ştatında həlak olub.

Son 24 saat ərzində təcili yardım xidmətləri 1000-dən çox insanı xilas edə bilib.

Kentukki qubernatoru Endi Beşir leysan yağışlarının ştatın son on ildə gördüyü ən ağır hava hadisələrindən biri adlandırıb.

Kentukki ştatının bir neçə yerində suyun səviyyəsi rekord həddə çatıb və yerli hakimiyyət orqanları 300-dən çox yerdə yolları bağlamaq məcburiyyətində qalıb. “PowerOutage” monitorinq resursuna görə, ştatda 30 minə yaxın istehlakçı işıqsız qalıb.