Nyu-Yorkda Banişevskinin xatirəsinə həsr olunmuş turnir keçirilib

ABŞ-ın Nyu-York şəhərində Azərbaycanın mərhum əfsanəvi futbolçusu Anatoli Banişevskinin xatirəsinə həsr olunmuş turnir keçirilib.

“Report”un yerli bürosu xəbər verir ki, turnir çərçivəsində azərbaycanlı uşaqlardan ibarət “My Way” futbol komandası Nyu-Yorkun 11-12 yaşlılardan ibarət 6 güclü kollektivi ilə qarşılaşıb. Uzun illərdir ABŞ-da yaşayan, “Neftçi”, “Kəpəz” və “Qarabağ” komandalarının veteran futbolçusu Arif (Aron) Zərbailovun idarəçiliyi ilə keçirilən turnirdə “My Way” Nyu-Yorkun “Çernomorets” klubunu 3:1 hesabı ilə məğlub edərək finala çıxıb.

"My Way” Uşaq və Yeniyetmələrin Yaradıcılığının İnkişafı Mərkəzinin rəhbəri Alyona Bədəlova turnir iştirakçılarına kubok və A.Banişevskinin fotosunun əks olunduğu medallar təqdim edib.

Turnirin təşkilatçısı A.Zərbailov “Report”a müsahibəsində deyib ki, Banişevski adına turnir 2015-ci ildən ənənəvi olaraq hər il keçirilir:

“My Way” komandasını səkkiz il öncə ABŞ-da yaşayan azərbaycanlı ailələrin övladlarını bir yerə yığaraq yaratmışıq. Bu komanda "My Way” Uşaq və Yeniyetmələrin Yaradıcılığının İnkişafı Mərkəzinin nəzdində fəaliyyət göstərir. Məqsədimiz Azərbaycan futbolunun əfsanəvi futbolçularını ABŞ ictimaiyyətinə tanıtmaq və ölkəmizi uzaq Amerikada təbliğ etməkdir. Bununla yanaşı, hədəfimiz Azərbaycanın peşəkar futbol komandaları üçün ehtiyat futbolçular hazırlamaqdır. Artıq 8 ildir Banişevskinin xatirə turnirini keçiririk. Pandemiyaya baxmayaraq, yarışlara maraq olduqca böyükdür. Qalib olub-olmamalarına rəğmən, bütün iştirakçılara medallar veririk. Əminliklə deyə bilərəm ki, Banişevski turniri ilə ABŞ-da Azərbaycanı futbol arenasında çoxları tanımağa başladı. Futbol azarkeşləri bizim uşaqları izləmək üçün öz övladları ilə birlikdə turnirin keçirildiyi məkanlara gəlirlər. Onu da deyim ki, bir neçə gün sonra peşəkar futbolçuların oynadığı “Neftçi Nyu-York" komandası da Banişevski turniri çərçivəsində yarışlara qatılacaq”.