Fuad Muradov: "Ulu Öndər Heydər Əliyevin planları hər zaman türk dünyasının inkişafı ilə bağlı olub"

"Ulu Öndər Heydər Əliyevin planları hər zaman Azərbaycanın bu günü, böyük türk dünyasının inkişafı ilə bağlı olub".

"Report" xəbər verir ki, bunu Bakıda “Türk Dövlətlərinin Diaspor Gənclərinin I Forumu: Heydər Əliyev və Türk Dünyası” adlı tədbirdə Diasporla İş üzrə Dövlət Komitəsinin sədri Fuad Muradov deyib.

Komitə sədri Heydər Əliyevin diaspor sahəsindəki fəaliyyətinə diqqət çəkib: "Heydər Əliyev hər zaman Azərbaycan diasporunun şaxələnməsinə böyük diqqət göstərib. Hələ 1994-cü ildə Ulu Öndər dövlət başçılarının İstanbul sammitində demişdi: "Bizim əməkdaşlığımız xalqlarımızın dil və fəaliyyət birliyi əsasında qurulub. Biz bundan səmərəli istifadə etməliyik". Ümummilli lider TÜRKSOY-un Bakıda keçirilən qurultayında qeyd etmişdir ki, TÜRKSOY xalqlarımız barədə daha çox iş görə bilər. Abay Kunanbayevin 150, Əmir Teymurun 660, Füzulinin 500 illik yubileyi kimi əlamətdar hadisələr bu fonda önəmlidir".

O əlavə edib ki, diaspor gənclərinin Azərbaycana gəlişi tarixi bir vaxta təsadüf edir: "Siz tarixi bir zamanda Azərbaycandasınız. Bəlkə də 200-300 il ərzində Azərbaycan ilk dəfə ərazilərinin tam suverenliyini bərpa edib. Məhz belə bir ərəfədə türk dünyasının gəncləri Azərbaycandadır".