Saməddin Əsədov: "Beynəlxalq Kosmosa əsaslanan İqlim Fəaliyyəti öhdəliyini qəbul edəcəyik"

Bu gün COP29 çərçivəsində Beynəlxalq Kosmosa əsaslanan İqlim Fəaliyyəti öhdəliyi qəbul ediləcək.

"Report" xəbər verir ki, bunu Rəqəmsal İnkişaf və Nəqliyyat Nazirliyi yanında Kosmik Agentliyin ("Azərkosmos") İdarə Heyətinin sədri Saməddin Əsədov COP29 çərçivəsində keçirilən Dünya Kosmik Liderlərinin Sammitində deyib.

O bildirib ki, kosmik fəaliyyətlərin iqlim problemlərinin həllinə verdiyi töhfələrə son illərdə diqqət yetirilməyə başlanılıb: "Keçən il Birləşmiş Ərəb Əmirlikləri Kosmik Agentliyindəki həmkarlar ilk Kosmik Agentliyin Liderlər Sammitinə ev sahibliyi etməklə bu sahədə diqqətəlayiq nümunə göstərdilər. Bu gün biz Azərbaycan Kosmik Agentliyi olaraq bu bayrağı uğurla irəli aparmışıq. Bakı COP29 - Kosmik Liderlər Sammiti COP29 Sədrliyinin yüksək səviyyəli tədbirlərindən biridir. Bir daha biz kosmik həllərin qlobal məqsədlərə, fəaliyyətlərə və əməkdaşlığa necə töhfə verdiyinin şahidi oluruq".

"Azərkosmos"un İdarə Heyətinin sədri qeyd edib ki, bugünkü sammitdə ölkələrin mövqelərinin birgə iqlim fəaliyyəti üzrə birgə səylər, tərəfdaşlıq, potensial və məlumat paylaşımı mövzusu ilə uzlaşdırılmasına diqqət yetiriləcək: "Kosmik texnologiya təkcə kəşfiyyat vasitəsi deyil, həm də rəqəmsal infrastruktur, iqlim fəaliyyəti, innovasiya, davamlılıq və qlobal əlaqə ilə sıx inteqrasiya olunur.

Nəhayət, kosmosa təkcə bir vasitə kimi deyil, həm də elm, texnologiya, siyasət və digər fəaliyyətlər arasında körpü kimi baxmaq lazımdır. Bu sammit kosmik agentliklər, beynəlxalq təşkilatlar, hökumətlər, tədqiqatçılar və özəl sektor arasında daha güclü tərəfdaşlıq qurmaq üçün mühüm imkan yaradır".