Azərbaycan daha bir ölkədən konservləşdirilmiş balıq idxal etməyə başlayıb

Bu ilin yanvar ayında Azərbaycana xaricdən 1,4 milyon ABŞ dolları dəyərində 425 ton hazır və ya konservləşdirilmiş balıq gətirilib.

“Report”un Dövlət Statistika Komitəsinin məlumatları əsasında apardığı hesablamalara əsasən, bu, 2022-ci ilin eyni dövrünün göstəricisindən dəyər ifadəsində 66 %, kəmiyyət olaraq – 59,2 % çoxdur.

Hesabat dövründə Türkiyədən 492,6 min ABŞ dolları dəyərində (bir il əvvəlki göstəricidən 2,3 dəfə çoxdur) 68 ton (+84 %), Çindən 316 min ABŞ dolları dəyərində (+12 dəfə) 111 ton (+69,3 dəfə), Rusiyadan 251,4 min ABŞ dolları dəyərində (-43 %) 115,3 ton (-29 %), İrandan 109 min ABŞ dolları dəyərində (+58 %) 67,2 ton (+51,4 %), Ukraynadan 85,3 min ABŞ dolları dəyərində (+17 dəfə) 33,7 ton (+7,7 dəfə) məhsul alınıb.

Bu il son 12 ildə (qeyd: xarici ticarət üzrə açıq istifadədə olan rəsmi statistika 2011-ci ilə kimidir) ilk dəfə olaraq Omandan (0,06 min ABŞ dolları dəyərində 0,01 ton) tədarük həyata keçirilib.