İmişlidə yem bitkilərinin yığımı yekunlaşıb, bu il məhsuldarlıq aşağı olub

İmişli rayonunda yem bitkilərinin yığımı yekunlaşıb.

Bu barədə "Report"un Muğan bürosuna İmişli Dövlət Aqrar İnkişaf Mərkəzindən məlumat verilib.

Məlumata görə, cari il ərzində 18 469 hektar sahədə yem bitkisi becərilib. Sahələrdən 171 297 ton məhsul əldə olunub.

Ötən il isə 18 332,7 hektar sahədə yem bitkisi becərilib, sahələrdən isə 173 187,7 ton məhsul toplanıb.

Fermerlər məhsuldarlığın azalmasını, əsasən bu il hava şəraitinin qeyri-sabit keçməsi ilə əlaqələndirirlər. Belə ki, biçinlər vaxtı yağıntılı hava şəraiti məhsuldarlığı aşağı salıb.