Gürcüstan Azərbaycana tərəvəz ixracını 4 dəfə artırıb

Bu ilin yanvar ayında Gürcüstan Azərbaycana 527 min ABŞ dolları dəyərində tərəvəz məhsulları ixrac edib.

“Report”un Gürcüstanın Milli Statistika İdarəsinin məlumatları əsasında apardığı hesablamalara əsasən, bu, 2023-ci ilin eyni dövrünün göstəricisindən 4 dəfə çoxdur.

Hesabat dövründə Gürcüstandan xarici ölkələrə 22,2 milyon ABŞ dolları dəyərində tərəvəz məhsulları göndərilib ki, bu da bir il əvvəlki göstəricidən 26 % çoxdur.

Ötən ay Gürcüstan Rusiyaya 8,4 milyon ABŞ dolları dəyərində, Ermənistana 2,7 milyon ABŞ dolları dəyərində, Çinə 2,5 milyon ABŞ dolları dəyərində, Almaniyaya 1,7 milyon ABŞ dolları dəyərində, Fransaya 1 milyon ABŞ dolları dəyərində məhsul ixrac edib.

Xatırladaq ki, 2023-cü ildə Gürcüstan xarici ölkələrə 265 milyon ABŞ dolları dəyərində tərəvəz məhsulları satıb ki, bunun da 3,51 milyon ABŞ dolları Azərbaycanın payına düşüb.