Azərbaycanda arıçılığın inkişaf etdirilməsinə dair fikir mübadiləsi aparılıb

Kənd təsərrüfatı naziri Məcnun Məmmədov "Azərbaycan Arıçılar Assosiasiyası" İctimai Birliyinin İdarə Heyətinin üzvləri ilə görüşüb.

"Report" nazirliyə istinadən xəbər verir ki, görüşdə arıçılıq sahəsində mövcud vəziyyət və bu sahənin inkişaf etdirilməsi ətrafında geniş fikir mübadiləsi aparılıb.

Nazir bildirib ki, ölkəmizdə arıçılığın inkişaf etdirilməsi kənd əhalisinin gəlirlərinin artmasına və məşğulluğunun təmin edilməsinə ciddi təsir göstərir. Bu səbəbdən dövlət tərəfindən arıçılığın subsidiyalaşdırılması istiqamətində müvafiq addımlar atılıb, 2018-2023-cü illərdə hər arı ailəsinə görə arıçı fermerlərə subsidiya ödənilib. Dövlət dəstəyi sayəsində ölkəmizdə həm arı ailələrinin, həm arıçılıqla məşğul olan şəxslərin sayında ciddi artım olub. Eyni zamanda Kənd Təsərrüfatı Nazirliyi Kollegiyasının qərarı ilə arıçılıqda istifadə olunan avadanlıq və texnikalar “Aqrar sahədə güzəşt tətbiq ediləcək texnikaların Siyahısı”na daxil edilib. Artıq uzun illərdir ki, ölkəmizdə nazirliyin və assosiasiyanın birgə dəstəyi ilə arıçılıq məhsullarının sərgi-satış yarmarkalarının təşkil olunduğunu deyən nazir bu tədbirin arıçıların gəlirlərinin formalaşmasında, həmçinin əhalinin arıçılıq məhsullarına olan tələbatlarının ödənilməsində mühüm rol oynadığını vurğulayıb. Azad olunmuş ərazilərdə kənd təsərrüfatı fəaliyyətinin təşkili çərçivəsində 4 il əvvəl Kəlbəcər və Laçın yaylaqlarına ilk arıçılıq təsərrüfatlarının köçürüldüyünü xatırladan nazir bildirib ki, artıq azad olunmuş ərazilərdəki digər yay otlaqlarına da təsərrüfatları köçürmək imkanları yaradılıb.

Assosiasiya sədri Bədrəddin Həsrətov rəhbərlik etdiyi ictimai qurumun nazirliklə sıx əməkdaşlıq etdiyini bildirib, son illər arıçılıqda əldə olunan nailiyyətlərdə bu əməkdaşlığın xüsusi rol oynadığını deyib. Assosiasiyada Azərbaycanın 50-yə qədər rayonundan 20 mindən çox arıçının təmsil olunduğunu deyən B.Həsrətov əsas missiyalarının ölkədə arıçılığın daha da inkişafına dəstək olmaq olduğunu vurğulayıb. Assosiasiya sədri bu istiqamətdə görülən işlər barədə geniş məlumat verib, respublikanın müxtəlif bölgələrində xarici ölkələrdən dəvət olunmuş nüfuzlu arıçıların iştirakı ilə çoxsaylı təlimlər, konfranslar keçirildiyini xatırladıb.

Görüşdə arıçılıq sahəsində ixtisaslı kadr hazırlığı, bu sahənin inkişafına dövlət dəstəyi mexanizmlərinin genişləndirilməsi, azad olunmuş ərazilərin yay otlaqlarının mövcud potensialından arıçılığın inkişafı üçün səmərəli istifadə, damazlıq təsərrüfatların fəaliyyətinin dəstəklənməsi, sərgi-satış yarmarkalarının daha səmərəli təşkili və sahənin digər aktual mövzuları ətrafında geniş fikir mübadiləsi aparılıb.

Görüşdə səsləndirilən təkliflər qeydə alınıb, təkliflərin dəyərləndirilməsi və icrası üçün müvafiq struktur bölmə və şöbələrə tapşırıqlar verilib.