Nizami Gəncəvi Beynəlxalq Mərkəzi BMT Sivilizasiyalar Alyansının forumunda iştirak edəcək

Nizami Gəncəvi Beynəlxalq Mərkəzi (NGBM) BMT-nin Sivilizasiyalar Alyansının təşkil etdiyi 10-cu Qlobal Forumuna tərəfdaşlıq edir.

Mərkəzdən "Report"a verilən məlumata görə, noyabrın 25-27-də Portuqaliyanın Kaşkai şəhərində keçiriləcək tədbirdə NGBM-nin həmsədrləri - Latviyanın sabiq prezidenti xanım Vayra Vike-Frayberqanın və Dünya Bankının vitse-prezidenti Dr. İsmail Serageldinin rəhbərliyi ilə qurumun 20-dən çox üzvü iştirak edəcək.

Toplantıda iştirakçılar arasında Bolqarıstanın sabiq Prezidenti Rozen Plevneliyev, Serbiyanın sabiq Prezidenti Boris Tadiç, Latviyanın sabiq Prezidentləri Valdis Zatlers və Egils Levits, Bosniya və Herseqovinanın sabiq Prezidenti Mladen İvaniç, Şimali Makedoniya Respublikasının sabiq Prezidenti George İvanov, Xorvatiyanın sabiq Prezidenti Kolinda Qrabar-Kitaroviç, Bosniya və Herseqovinanın BMT-də daimi nümayəndəsi və sabiq Baş naziri Zlatko Laqumdziya, Belçikanın sabiq Baş naziri İv Leterm, Seneqalın sabiq Baş naziri Aminata Ture, Yunanıstanın sabiq Baş naziri Corc Papandreu var.

Bundan başqa, Avstriyanın sabiq federal xarici işlər naziri və Avropa Komissarı Benita Ferrrero-Valdner, Monteneqronun sabiq müdafiə naziri Miliça Peyanoviç-Durisiç, Gürcüstanın sabiq Baş nazirinin müavini Eka Tkeşelaşvili, Ərəb Dövlətləri Liqasının sabiq Baş katibi Əmr Musa, BMT Baş Assambleyasının 73-cü Prezidenti Mariya Fernanda Espinosa və 75-ci Prezidenti Volkan Bozkır, YUNESKO-nun xoşməramlı səfiri Hedva Ser, NGBM-nın Baş katibi Rövşən Muradov, NGBM-nin Strateji və Dayanıqlı İnkişaf Layihələri üzrə koordinatoru Rza Əliyev yer alıblar.

Mərkəz üzvləri səfər çərçivəsində ötən günlərdə keçirilmiş COP29-un nəticələrini və qarşıdan gələn 12-ci Qlobal Bakı Forumuna hazırlığı müzakirə edəcəklər.