“The Travel”: Azərbaycanın turistlər arasında populyarlığının 10 səbəbi var

Məşhur “The Travel” nəşri Azərbaycanın turistlər arasında populyar olmasının 10 səbəbini (Odlar Yurdu olması, Bakının gözəlliyi, memarlıq möcüzələrinin çoxluğu, palçıq vulkanları və onların möhtəşəmliyi, zəngin milli kulinariya, neft kurortu – Naftalan, dünya irsi siyahısına salınmış ev, “İpək Yolu” şəhəri – Şəki, valehedici Xəzər dənizi, dünyanın 9 iqlim qurşağının Azərbaycanda yerləşməsi) açıqlayıb.

“Report” xəbər verir ki, məqalədə zəngin mədəni tarixə malik ölkələrlə həmsərhəd olan Azərbaycanın yaşayış üçün ideal məkana çevrildiyi qeyd edilir.

Qeyd edilir ki, ölkə 1980-ci illərdən məşhur turizm məkanıdır. Lakin turizm sənayesinin keçmiş Sovet İttifaqının süqutundan və ərazi münaqişəsindən zərər çəkdiyi, 2000-ci illərdə tədricən bərpa edildiyi, Azərbaycanın hazırda həvəskar turistləri qəbul etməyə hazır olduğu bildirilir.

Azərbaycanın turistlər arasında populyarlığının əsas səbəblərindən biri kimi “Odlar yurdu” olduğu, qaz və neftlə zənginliyi vurğulanır.

Ölkənin paytaxtının qonaqpərvər olduğu, müxtəlif zövqlərə malik turistləri cəlb edən heyrətamiz müasir və qədim yerlərə ev sahibliyi etdiyi qeyd edilib. Onun füsunkar İçərişəhərinin Şirvanşahlar Sarayının Qız Qalası ilə yanaşı UNESCO-nun Dünya İrsinə salındığı bildirilir.

“Bakıda İçərişəhərdən tutmuş limana qədər memarlıq üslublarının maraqlı qarışığı var. Turistlər bunu təsəvvür etməlidirlər: qədim İslam tikililərinin hüzurunda olduqdan sonra onlar uzaqdan Alov Qüllələri kimi müasirliyi əks etdirən uca binaları görəcəklər. Belə ekzotik tikililərlə yanaşı, Seyid Mirbabayev sarayı və Gülüstan Sarayı kimi Rusiya imperiyası və sovet dövründə layihələndirilmiş tikililər də var.

Onun teatrları, muzeyləri, kitabxanaları və digər ictimai binaları da diqqətdən kənarda qalmır. Bakıda turistlər hər yerə göz gəzdirsələr, heyran qalacaqlar”.

Azərbaycanın turistlər arasında populyar olmasının əsas səbəblərindən biri də palçıq vulkanlarının möhtəşəmliyidir.

Yanar Dağdan başqa Azərbaycanın digər görməli yerləri palçıq vulkanlarıdır. Ölkə dünyada ən çox palçıq vulkanına malikdir: “Azərbaycanda 400-dən çox palçıq vulkanı var. Böyük Kənizədağ və Torağay planetin ən böyük palçıq vulkanları arasındadır. NASA-nın məlumatına görə, bu təbiət möcüzələrinin quruluşu dağlıq Marsın quruluşuna bənzəyir və bu, dünyadan kənarda olan Azərbaycan xəzinələrini ziyarət etmək üçün cəlbedici səbəbdir”.

Turistləri cəlb edən əsas səbəblərdən biri də milli kulinariyadır. Azərbaycanda mal, qoyun və balıq ətindən bişirilən yeməkləri çox sevirlər, ona görə də bu yeməkləri sevənlər ölkənin dadlı yeməklərindən həzz alacaqlar: “Turistlər səhərlər qutab, naharda ləvəngi, axşam yeməyində piti şorbası, desertdə isə şirin halva dada bilərlər. Qarışığa bir şərab əlavə edin və bu, saf xoşbəxtlikdir”.

“Naftalandan çıxan neftdə alternativ təbabətdə istifadə olunan naftalin yüksək konsentrasiyaya malikdir. Belə ki, Naftalan kurortu qonaqların xam neftlə doldurulmuş çəlləkdə çiməcəkləri spa xidmətləri təklif etməklə “qara qızıl”dan yararlanıb”. Naftalan yağı dəri müalicələri üçün də istifadə olunur. Bu yağ vannası yeni bir şey sınamaq istəyən turistlər üçün idealdır.

Möhtəşəm İçərişəhərdən başqa, Azərbaycanın Qobustan Qayaüstü İncəsənət Mədəni Landşaftı və Şəki şəhəri UNESCO-nun dünya irsi siyahısına salınıb. Birincisi Qobustan Dövlət Tarix-Mədəniyyət Qoruğunda yerləşir, ərazi arxeoloji möcüzələrlə doludur.

Azərbaycan İpək Yolu adlanan qədim ticarət şəbəkəsinin mühüm hissəsidir. Ölkənin ən qədim yaşayış məntəqələrindən olan Şəki şəhərinin mərkəzi qədim memarlıq ənənələrinin təsiri altında yaxşı qorunan ənənəvi evləri və ticarət evləri ilə şöhrət qazanıb. Şəhər mərkəzinin diqqəti cəlb edən yeri “İpək yolu” ticarət mərkəzi olan Şəki Xan Sarayıdır.

Məqalədə Azərbaycanın şərqində dünyanın ən böyük daxili su hövzəsi olan Xəzər dənizinin yerləşdiyi vurğulanır: “Xəzər sahilləri su idman növləri təklif edən çimərlik kurortları ilə doludur. Sevimli anlar üçün turistlər təmiz Zağulba çimərliyinə baş çəkməlidirlər, Mərdəkan isə gün batımını seyr etmək üçün idealdır. Daha çox çimərliklər var, hamısı əlçatandır və yalnız Xəzər dənizinin verə biləcəyi səssizliyi təklif edir”.

Qeyd edilir ki, dünyanın 11 iqlim qurşağından 9-u Azərbaycandadır: “Beləliklə, təbiət həvəskarları onun iqlimi ilə sulu bir çox mənzərəsini yoxlamaqdan həzz alacaqlar. Ölkə küləkli Qafqazdan cənubdakı subtropik ərazilərə qədər turizm fəaliyyətinin qaynar nöqtəsidir”.