ADRA: "Yayımı dayandırılan reklamların 12%-i dil normalarının pozulması ilə bağlı olub"

Bu ilin birinci yarısında açıq məkanda yayımı dayandırılan reklamların 12%-i dil normalarının pozulması ilə bağlı olub.

Bu barədə "Report"un sorğusuna cavab olaraq Azərbaycan Dövlət Reklam Agentliyindən (ADRA) bildirilib.

Qeyd edilib ki, 2023-cü ilin 6 ayı ərzində açıq məkanda ölkə üzrə 3914 reklamın yayımı dayandırılıb. Sökülən reklamların 472-si dövlət dili normalarının pozulması ilə bağlı olub.

"Açıq məkan reklamlarında dil normalarının pozulması hallarına daha çox Bakı şəhərində rast gəlinib. Azərbaycan dilinin təhrif olunması ilə bağlı paytaxda yayımı dayandırılan reklamların sayı cari ilin ikinci rübündə birinci rüblə müqayisədə 11% çox olub, - məlumatda vurğulanıb.