Direktor: "Karbamid Zavodunun tikinti işləri 95% yekunlaşıb"

Bakı. 29 noyabr. REPORT.AZ/ Azərbaycan Dövlət Neft Şirkətinin (SOCAR) Sumqayıtda inşa edilən Karbamid Zavodunun tikinti işləri 94,7% yekunlaşıb.

"Report" xəbər verir ki, bunu Bakıda keçirilən "Xəzər və Mərkəzi Asiya neft emalı və neft-kimya" konfransında zavodun direktoru Xəyal Cəfərov bildirib.

Onun sözlərinə görə, zavodda ümumi işlərin 98,4%-i yerinə yetirilib: "Mühəndislik işləri, satınalmalar 100%, quraşdırma işləri isə 91,7% tamamlanıb".

X.Cəfərov həmçinin qeyd edib ki, bu ilin sonunda mexaniki işlər başa çatacaq, ilin əvvəlində istismar-sınaq işlərinə başlanacaq, gələn il ortasında isə zavod istifadəyə veriləcək.

O əlavə edib ki, zavodun tikintisi dövründə burada 2 200-3 600 nəfər çalışıb. İstismar dövründə isə zavodda 400-450 işçi olacaq.

X.Cəfərovun sözlərinə görə, müəssisədə ildə 650-660 min ton karbamid istehsal olunacaq: "Bunun 150-200 min tonu daxili bazar, qalan hissəsi isə ixrac üçün nəzərdə tutulub. İxracda Türkiyə əsas marşrut olacaq. Gürcüstan, digər Qara və Aralıq dənizi ölkələri də ixrac marşrutları ola bilər".