Britaniya şirkəti dekabrda “Gilar” yatağından ilk filiz hasilatına başlayacaq

Azərbaycanda qızıl, gümüş və mis hasilatı ilə məşğul olan Böyük Britaniyanın “Anglo Asian Mining” şirkəti bu ilin dekabr ayında “Gilar” yatağından ilk filiz hasilatına başlayacaq.

“Report” xəbər verir ki, bu barədə şirkətin məlumatında bildirilib.

"Gilar" mədəninin işlənməsinə 2023-cü ildə başlanılııb və ilk filizin 2024-cü ilin dekabr ayında hasil ediləcəyi gözlənilir", - məlumatda qeyd edilib.

Şirkət həmçinin vurğulayıb ki, plana görə hər ton üçün 1,6 qram qızıl və ayda 2 % mis olan təxminən 35-40 min ton filiz hasilatı və emalı planlaşdırılır. “Gilar” filizini emal etmək üçün emal yenidən konfiqurasiya ediləcək və qarışdırılmış süzülmə zavodu ilkin olaraq filizi emal edərək mis hasil etmək üçün tullantılarının sonrakı flotasiya emalı ilə məşğul olacaq.

Xatırladaq ki, hazırda “Anglo Asian Mining” “Gədəbəy” və “Qoşa” müqavilə sahələrindən qiymətli metal hasil edir. “Gədəbəy” yatağından ilk qızıl hasilatına 2009-cu ildə, gümüş hasilatına 2010-cu ildə başlanılıb. Şirkət 2013-cü ilin sentyabr ayında “Qoşa” müqavilə sahəsinin işlənməsinə başlayıb.

“Gilar” yatağının qızıl ehtiyatları 249 min 83 unsiya qızıl, 46 min 466 ton mis və 48 min 786 ton sink olaraq qiymətləndirilir.

“Production Sharing Agreement” (PSA) tipli müqavilə 1997-ci il avqust ayının 21-də imzalanıb və 6 yatağın işlənməsini nəzərdə tutur. Müqavilədə Azərbaycanın payı 51 %, “Anglo Asian Mining PLC” şirkətinin payı 49 % təşkil edir. Hazırda şirkət Azərbaycanda 8 müqavilə sahəsini işləmək hüququna malikdir.