Sumqayıtda məşhur şirkətin əməkdaşları qəzaya düşüb, 7 nəfər xəsarət alıb

Bu gün səhər saatlarında Bakı-Quba yolunun Sumqayıt Texnologiyalar Parkından keçən hissəsində "Hyundai" markalı mikroavtobus qəza törədib.

"Report" xəbər verir ki, qəza nəticəsində 7 nəfər müxtəlif dərəcəli bədən xəsarətləri alıb.

Sumqayıt Tibb Mərkəzindən bildirilib ki, Təcili Tibbi Yardım Stansiyasına xəsarət alanların olması ilə bağlı çağırış daxil olub: "Həmin şəxslər Sumqayıt Təcili Tibbi Yardım Xəstəxanasına gətirilib, ilkin tibbi yardım göstərildikdən sonra ambulator müalicə üçün buraxılıb".

Hüquq-mühafizə orqanlarından "Report"a bildirilib ki, qəza nəticəsində xəsarət alanlar "Met-AK" şirkətinin əməkdaşları olub.