Aralıq dənizində qanunsuz miqrantları daşıyan qayıq aşıb, 283 şəxs xilas edilib

Aralıq dənizinin Türkiyənin Antaliya şəhərinin Kaş rayonu sahillərində qanunsuz miqrantları daşıyan qayıq aşıb, təhlükə ilə üzləşən 283 şəxs xilas edilib. 

“Report” “TRTHaber”ə istinadən xəbər verir ki, bu barədə Türkiyə Daxili İşlər Nazirliyi Sahil Mühafizə Komandanlığının açıqlamasında bildirilib.

Məlumata görə, qayıq Kaşın sahilindən 180 km məsafədə olub və həyəcan çağırışı edilib. Türkiyə xilasediciləri qanunsuz miqrantları daşıyan qayığa yardım göstəriblər. Onlar qayıqdan ticarət gəmisinə köçürülüb. Hadisə yerinə Sahil Mühafizə Komandanlığının 4 qayığı cəlb olunub. Miqrantlar Antaliyaya göndəriliblər.

Onların hansı ölkənin vətəndaşları olduqları barədə məlumat yayılmayıb.