Türkiyədə bir gündə üç PUA-nın qalıqları aşkarlanıb

Türkiyədə bir gün ərzində üçüncü pilotsuz uçuş aparatının (PUA) qalıqları aşkarlanıb.

"Report" xəbər verir ki, bu barədə "Nefes" qəzeti məlumat yayıb.

Gövdə hissəsi Qara dəniz sahilində, Sakarya vilayətində tapılan PUA-nın digər hissələri Başoğlu kəndi ərazisindəki çimərlikdə aşkarlanıb. Aparatda partlayıcı maddə olmayıb.

Qeyd edək ki, avqustun 15-də Türkiyənin şimalındakı Düzcə vilayətində də ehtimal olunan PUA düşüb. Aparat Yeşilköy kəndindəki bağda aşkarlanıb. Həmin gün İstanbul vilayətinin sakinləri də beynəlxalq hava limanının yaxınlığında yerləşən sahildə PUA olduğu ehtimal edilən bir aparat tapıblar. Hadisə ilə bağlı müvafiq qurumlar tərəfindən araşdırma aparılıb.