Litvanın XİN başçısı: “NATO ölkələri Kiyevə silah tədarükündən imtina etməməlidir”

“Ukrayna Silahlı Qüvvələri öz ərazilərini NATO standartlarına uyğun silahların köməyi ilə azad edə bilər”.

“Report” xəbər verir ki, bunu Litvanın xarici işlər naziri Qabrielyus Landsberqis “Ukrinform”a müsahibəsində deyib.

“Ukrayna ordusu NATO standartlarına uyğun silahlardan istifadə etməklə işğal olunmuş əraziləri azad edə bilər. İndi biz elə bir məqamdayıq ki, əvvəllər istifadə edilən arqumentlər artıq aktual deyil”, - o vurğulayıb.

Landsberqis qeyd edib ki, hazırda müttəfiq ölkələr Ukraynaya hərbi yardım göstərməkdən imtina edə bilməz: “Bu barədə artıq dəfələrlə danışmışam və yenidən təkrar edirəm ki, bütün ehtiyatlarımız Ukrayna ordusu üçün açılmalıdır”.

Nazir əlavə edib ki, hazırda müxtəlif ölkələrdə ukraynalıların hərbi təlim keçdiyi platformalar var.