Xankəndi-Laçın yolunda Xocalı soyqırımının ildönümü ilə bağlı “Badam çiçəyi” kompozisiyası quraşdırılıb

Xankəndi-Laçın yolunda aksiyanın keçirildiyi ərazidə Xocalı soyqırımının 31-ci ildönümü ilə bağlı “Badam çiçəyi” kompozisiyası quraşdırılıb.

“Report”un aksiya keçirilən ərazidəki əməkdaşı xəbər verir ki, kompozisiyada badam çiçəyinin bir ləçəyinin düşdüyü və birinin isə üzərinə qan töküldüyü əks olunub.

Qeyd edək ki, aksiya ərazisində rus və ingilis dillərində “Xocalıya ədalət” şüarı yer alan lövhələr də quraşdırılıb.

Həmçinin aksiya iştirakçıları Azərbaycan, rus və ingilis dillərində “Xocalıya ədalət”, “Xocalı soyqırımını unutma”, “Xocalı soyqırımı XX əsrin faciəsi” kimi şuarlar səsləndirirlər.

Xatırladaq ki, Qarabağda faydalı qazıntı yataqlarının qanunsuz istismarı əleyhinə Şuşadan keçən Xankəndi-Laçın yolundakı etiraz aksiyası 77 gündür davam edir.

Belə ki, Şuşa ərazisində Rusiya sülhməramlılarının nəzarətində olan yolun bir hissəsində etiraz aksiyası azərbaycanlı fəallar və ekologiya üzrə qeyri-hökumət təşkilatlarının (QHT) üzvləri tərəfindən Qarabağ iqtisadi rayonunda ekoloji terrora son qoyulması tələbi ilə keçirilir.

2022-ci il dekabrın 3-də və 7-də Rusiya sülhməramlı kontingentinin komandanlığı ilə aparılmış müzakirələrin nəticəsi olaraq İqtisadiyyat Nazirliyi, Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət heyət Rusiya sülhməramlı kontingentinin müvəqqəti yerləşdiyi Azərbaycan ərazilərində faydalı qazıntı yataqlarının qanunsuz istismarı, bundan irəli gələn ekoloji və digər fəsadlarla bağlı ilkin monitorinq aparmalı idi. Lakin sülhməramlıların hərəkətsizliyi ucbatından monitorinq baş tutmayıb.