Baş ravvin: "Bunları görmək çox ağrılıdır"

“Azad edilmiş torpaqlarımızı bu vəziyyətdə görmək çox ağrılıdır. Uzun illərdir insanlar öz yurd-yuvalarına qayıda bilməyib”.

“Report” xəbər verir ki, bunu Azərbaycan aşkenazi yəhudilərinin baş ravvini Şneor Seqal Ağdamda jurnalistlərə bildirib.

“Məncə, bu kədərli, acılı səhifəni çevirməliyik. İllər ötdü, bütün dini icmaların nümayəndələri burada toplaşıb bir yerdə dua etdilər. Mənə elə gəlir ki, uca Allah bizə baxaraq bu sınaqdan üzüağ çıxdığımızı görür. Buraya geri qayıtdıq, amma düşüncələrimiz başqadır, qurmaq, yaratmaq, insanları bir araya gətirmək fikrindəyik. İnşallah, Allah bizi bu gün bir yerdə görüb bu torpaqlara xeyir-bərəkət nazil edəcək. Allah Prezidentimizə də, bu yerlərə həyatı qaytaran hər kəsə də güc və qüvvət versin!”, - deyən baş ravvin şəhidlərin ruhuna, müharibədə yaralananların şəfa tapmasına dua edib, növbəti dəfə Ağdama gələndə firavan diyar görəcəklərinə ümidvar olduğunu bildirib.