ABŞ Azərbaycan-Ermənistan dialoqunun yenilənməsini alqışlayıb

ABŞ Azərbaycan və Ermənistanın sülh prosesini birbaşa dialoq yolu ilə bərpa etmək əzmini alqışlayır.

"Report" un məlumatına görə, bu barədə ABŞ dövlət katibinin Avropa və Avrasiya məsələləri üzrə köməkçisinin birinci müavini Derek Hoqan və Milli Təhlükəsizlik Şurasının Avropa üzrə baş direktoru Amanda Slout ATƏT-in Minsk Qrupunun həmsədrləri ilə görüşdə bildiriblər.

Onlar Birləşmiş Ştatların Ermənistana və Azərbaycana bütün həll olunmamış məsələləri həll etməyə kömək, həmçinin itkin düşənlər, ərazilərin minalardan təmizlənilməsi ilə bağlı həmsədrlərlə əməkdaşlığı davam etdirməyə sadiqliyini bildiriblər.

Görüş iştirakçıları ötən həftə BMT Baş Assambleyası çərçivəsində keçirilən Azərbaycan və Ermənistan xarici işlər nazirlərinin 2020-ci ilin noyabrından indiyədək ilk birgə görüşünün keçirilməsinə uğurlu köməyi müzakirə ediblər.

Onların fikrincə, yalnız bütün problemləri həll edən qətnamə iki ölkə arasındakı münasibətləri normallaşdıra və bölgə xalqlarının sülh şəraitində yaşamasına imkan verə bilər.