Azərbaycan və Özbəkistan arasında mədəni əlaqələrin inkişafı ilə bağlı əməkdaşlıq protokolu imzalanıb

“İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Şahin Seyidzadə Özbəkistanın Xarəzm vilayəti hökumətinin nümayəndəsi Maksud Bekçanovun rəhbərlik etdiyi nümayəndə heyəti və həmin ölkənin Azərbaycandakı səfiri Baxrom Aşrafxanovu qəbul edib.

Bu barədə "Report"a İdarədən məlumat verilib.

Görüşün əsas məqsədi "İçərişəhər” DTMQ və “İçan-Qala” Dövlət Muzey Qoruğu arasında əməkdaşlıq məsələlərinin müzakirəsi, eləcə də iki tarixi qoruq arasında “Qarşılıqlı Anlaşma və Əməkdaşlıq haqqında Protokol”un imzalanmasıdır.

Protokol “İçərişəhər” DTMQİ-nin İdarə Heyətinin sədri Şahin Seyidzadə və “İçan-Qala” Dövlət Muzey Qoruğunun direktor müavini Rustom Erniyazov tərəfindən imzalanıb.

Daha sonra qonaqların Qoruq İdarəsinin tabeliyində fəaliyyət göstərən “İçərişəhər” Ənənəvi İncəsənət Mərkəzinin fəaliyyəti ilə tanış olması üçün ekskursiya təşkil edilib.

Qeyd edək ki, imzalanmış protokolun əsas məqsədi iki qurum arasında mədəni irsin təşviqi, turizm və mədəniyyət sahələrində birgə tədbirlərinin təşkili istiqamətində əməkdaşlığın həyata keçirilməsi, bununla da iki ölkə arasında münasibətlərin genişləndirilməsi və mədəni əlaqələrin daha da inkişaf etdirilməsinə töhfə verməkdir.