​Mərkəzi Bankda yeni sistemin yaradılması ilə bağlı tender elanı ləğv edilib

Bakı. 26 fevral. REPORT.AZ/ Azərbaycan Mərkəzi Bankında (AMB) xarici valyuta əməliyyatlarının aparılmasının avtomatlaşdırılmış monitorinq sisteminin yaradılması ilə bağlı açıq tender elanını ləğv edib. "Report"un verdiyi xəbərə görə, bu barədə Tender Komissiyasının rəsmi qəzetdə dərc olunmuş elanında məlumat verilir.

Qeyd edək ki, tender elanı bu ayın əvvəlində rəsmi qəzetdə dərc olunub. Elana əsasən, iddiaçı ilə xarici valyuta əməliyyatlarının aparılmasının avtomatlaşdırılmış monitorinq sisteminin yaradılması üçün tender üzrə satın alınma müqaviləsi 6 aylıq bağlanmalı idi. Prosedur martın 1-də Mərkəzi Bankda keçiriləcəkdi.

İddiaçı tender təklifi və tender təklifinin bank təminatını möhürlənmiş, imzalanmış yazılı surətini fevralın 29-dək, digər tələb olunan sənədləri isə ən geci fevralın 18-dək təqdim etməli idilər.

Tenderdə iştirak haqqı kimi Mərkəzi Bankın hesabına 200 manat məbləğində pul köçürülürdü.