Azərbaycan bankları dövlət xidmətləri göstərəcək

Azərbaycanın iki böyük bankı öz sistemləri vasitəsi ilə dövlət xidmətlərini təmin edə biləcək.

"Report" xəbər verir ki, bunu Rəqəmsal İnkişaf və Nəqliyyat Nazirliyi yanında İnnovasiya və Rəqəmsal İnkişaf Agentliyinin sədrinin müavini Rəşad Xalıqov "PAŞA Holdinq" MMC-nin təşkilatçılığı ilə Bakıda keçirilən “INMerge” Innovasiya Sammitində bildirib.

"Açıq hökumət" təşəbbüsləri çərçivəsində həyata keçiriləcək bu layihə pilot mərhələdədir. Onun icrası üçün iki böyük bankla danışıqlar aparılır. Bu, konseptual şəkildədir", - deyə o qeyd edib.

"Biz özəl təşkilatlara dövlət xidmətləri göstərməyə, dövlətə aid olan sənədləri öz sistemlərindən, mobil tətbiqlərindən təqdim etməyə üçün imkan yaradırıq. Bunun üçün infrastruktur formalaşdırmışıq. Vətəndaşın rəqəmsal formada razılığı alınmaq şərtilə, banklar və özəl təşkilatlar ona dövlət xidmətləri göstərə bilərlər", - deyə sədr müavini əlavə edib.