AMB iqlim dəyişikliyi ilə bağlı maliyyə sistemini dəstəkləməyə çağırıb

Hazırda təkcə Azərbaycan üçün deyil, bütün dünya üçün iqtisadi artım yollarının tapılması vacibdir.

"Report" vəbər verir ki, bunu Azərbaycan Mərkəzi Bankının (AMB) sədri Taleh Kazımov "Bakı İqlim Fəaliyyəti Həftəsi"nin 4-cü günündə deyib.

O qeyd edib ki, Mərkəzi Bank iqlim dəyişikliyi ilə bağlı əsas vəzifələri dərk edir və maliyyə sektorunun üzləşə biləcəyi riskləri diqqətlə təhlil edir: "Belə şəraitdə maliyyə sabitliyi prioritetdir və biz milli inkişaf planları çərçivəsində ölkənin maliyyə sistemini dəstəkləməyə çalışırıq".

T. Kazımovun sözlərinə görə, AMB qlobal dəyişikliklərə səmərəli şəkildə uyğunlaşa bilən dayanıqlı maliyyə mühitinin yaradılmasına yönəlib və bu, uzunmüddətli iqtisadi artım üçün vacib amil hesab edilir.

O, ölkə iqtisadiyyatında "yaşıl maliyyələşdirmə"nin tətbiqinin zəruriliyini bəyan edib. T. Kazımov, 2023-cü ildə Dayanıqlı Maliyyələşdirmə üzrə Yol Xəritəsinin hazırlandığını bildirib.

"Bu strategiyanın əsas elementi COP29 konfransına qədər maliyyə bazarlarında tətbiq ediləcək "yaşıl maliyyələşdirmə" taksonomiyasının yaradılmasıdır", - AMB-nin sədri qeyd edib.

T. Kazımov, bu sistemin beynəlxalq standartlara uyğunluğunun vacibliyini vurğulayıb: "Bu, bizə yerli və beynəlxalq səviyyədə səmərəli qarşılıqlı əlaqə qurmağa imkan verəcək. Bu təşəbbüslər qlobal təcrübələrin Azərbaycanın maliyyə sisteminə inteqrasiyasına yönəlib".

Qeyd edək ki, Bakıda İqlim Həftəsi qlobal iqlim çağırışları şəraitində dayanıqlı iqtisadi inkişafın təmin edilməsinə yönəlmiş həllər axtarmaq üçün platforma təqdim etməyə davam edir.