Azərbaycan İstanbulda keçirilən Beynəlxalq Nəqliyyat Forumunda təmsil olunub

Türkiyənin İstanbul şəhərində VI Qara-Xəzər dənizləri Beynəlxalq Nəqliyyat Forumu keçirilib.

Bu barədə "Report"a "Azərbaycan Dəmir Yolları" QSC-nin (ADY) törəmə müəssisəsi - "ADY Konteyner" MMC-dən bildirilib.

Məlumata görə, tədbirdə regionun aparıcı nəqliyyat-logistika şirkətlərinin, nəqliyyat strukturlarının nümayəndələri, rəsmi şəxslər iştirak ediblər.

Forumun sessiyalarında çıxış edənlər beynəlxalq nəqliyyat dəhlizləri, Qara dəniz - Xəzər regionunun tranzit imkanları, transkontinental marşrutlar barədə məlumat veriblər. Türkiyənin konteynerlərlə yükdaşımalarda dəniz və quru qovşağı kimi roluna, Türkiyədən keçən yeni transkontinental dəmiryolu marşrutları, Avropa ilə Asiya arasında nəqliyyat əlaqələrində TRACECA və Xəzər limanlarının rolu məsələsinə toxunulub. Həmçinin səmərəli dəmiryolu xidmətlərinin, nəqliyyat-logistika infrastrukturunun yaradılması, tariflər mövzusunda fikir mübadiləsi aparılıb.

Pandemiya şəraitində Avropa ilə Asiya arasında dəmiryolu ilə yükdaşımaların rolunun artması xüsusi qeyd edilib.

Forumun işində “ADY Konteyner”in nümayəndələri də iştirak ediblər. Şirkətin direktoru Natiq Cəfərov forumda “Avrasiya dəmiryolu yük dəhlizlərinin kəsişməsi. Azərbaycanın dəmir yolu şəbəkəsi ilə yeni tranzit imkanlar” mövzusunda çıxış edib. O, ölkəmizin ərazisindən keçən nəqliyyat dəhlizləri, onların imkanları barədə forum iştirakçılarına məlumat verib, Avropa ilə Asiya arasında yükdaşımaların həcminin artırılması istiqamətində görülən işlərdən danışıb, Rusiyanın Uzaq Şərq limanlarından istifadə edilərək Asiya –Sakit okean regionu ölkələrindən Azərbaycandan tranzit keçməklə, Türkiyə və Avropaya yük daşımalarında Bakı-Tbilisi-Qars dəmir yolu xəttinin önəminə toxunub, yeni logistik məhsul kimi konteynerlərin Çinin Qaşqar şəhərindən Türkmənbaşı limanına, oradan fider gəmiləri vasitəsilə Bakıya, daha sonra BTQ ilə Türkiyə və Avropaya çatdırılması, həmçinin Gürcüstanınm Poti və Ukraynanın Odessa limanları arasında fəaliyyət göstərəcək fider gəmiləri ilə konteyner daşımalarının əhəmiyyətini vurğulayıb.