Vəkil: “Əsas məsuliyyət Əli Həsənovun, onun oğlunun və baldızının üzərinə düşür”

Bu gün Bakı Ağır Cinayətlər Məhkəməsində ləğv edilmiş Kütləvi İnformasiya Vasitələrinin İnkişafına Dövlət Dəstəyi Fondunun (KİVDF) sabiq icraçı direktoru Vüqar Səfərli, müvafiq vəzifələrdə çalışmış Bünyamin İsmayılov, Ədalət Vəliyev, Nadir Məmmədov, Bəxtiyar Fətullayev, Təmkin Xəlilov, Telman Tahirov, Valeh Orucov, Təhminə Yaqubova, Şahin İbrahimov və Namiq Hacıyevin cinayət işi üzrə məhkəmə iclası davam etdirilib.

"Report"un xəbərinə görə, hakim Azər Paşayevin sədrliyi ilə keçirilən prosesdə təqsirləndirilən Nadir Məmmədovun vəkili Cavanşir Süleymanov müdafiə çıxışı edib.

Vəkilin sözlərinə görə, cinayət işində əsas məsuliyyət Prezident Administrasiyasının sabiq şöbə müdiri Əli Həsənovun, onun oğlu Şamxal Həsənlinin və baldızı Gülər Vəliyevanın üzərinə düşür.

Vəkil bildirib ki, cinayət işi ilə bağlı ortaya heç bir qanuni, mötəbər sübut qoyulmayıb: "Nadir Məmmədov heç nə ödəməyib. Kim yeyibsə, o da ödəyib. Dəymiş ziyan və cərimə də tam ödənilib. Əli Həsənov ödəyib, ya Şamxal Həsənli, bunun bir əhəmiyyəti yoxdur. Əsas odur, ödənilib, sağ olsunlar, hələ artıq ödənilib".

Daha sonra təqsirləndirilən şəxslərə son söz verilib.

Prosesdə son sözlə çıxış edən T.Xəlilov, T.Yaqubova və Ş.İbrahimov məhkəmədən barələrində bəraət hökmünün çıxarılmasını xahiş ediblər.

V.Səfərli və digərləri çıxışlara hazır olmadıqları üçün məhkəmədən vaxt istəyiblər.

Məhkəmənin növbəti iclası dekabrın 21-də davam etdiriləcək.

Xatırladaq ki, dövlət ittihamçısı V.Səfərlinin 11 il, B.İsmayılov 7 il, Ə.Vəliyev 7 il, N.Məmmədov 7 il, B.Fətullayev 2 il, T.Xəlilov 2 il, T.Tahirov 7 il, V.Orucov 2 il, T.Yaqubova 6 il şərti, Ş.İbrahimov 2 il və N.Hacıyevin 7 il müddətinə azadlıqdan məhrum edilməsini istəyib.

Qeyd edək ki, cinayət işi üzrə V.Səfərli barəsində məhkəmənin qərarı ilə həbs, digər şəxslər barəsində isə polisin nəzarəti altına vermə qətimkan tədbiri seçilib.

İbtidai istintaq zamanı cinayətin törədilməsi nəticəsində vurulmuş maddi ziyanın bir hissəsinin ödənilməsi təmin edilmiş, habelə təqsirləndirilən şəxslərə məxsus olan daşınar və daşınmaz əmlak və bank əmanətlərinin üzərinə həbs qoyulub.

Cinayət işi üzrə Medianın İnkişafı Agentliyi (MEDIA) zərərçəkmiş qismində tanınıb.