Tovuzda sahibsiz itlər 4 baş qoyunu parçalayıb - FOTO

Tovuz. 12 mart. REPORT.AZ/ Tovuz rayonunda sahibsiz itlər 4 baş qoyunu parçalayıb.

“Report”un Qərb bürosu xəbər verir ki, hadisə rayonun Əlibəyli kəndində baş verib.

Fərzalı İsgəndərovun xırdabuynuzlu heyvanları örüşdən qayıdarkən itlərin hücumuna məruz qalıb. Quduz itlər heyvanlardan 3-nü yaralayıb, 1-ni isə parçalayaraq öldürüb.

Zərərçəkənin sözlərinə görə, quduzlaşmış itlərin sayı kənddə günbəgün artır. Təhlükə mənbəyinə çevrilən canlılar azyaşlı uşaqların oyun meydançasında daha çox gözə çarpdığından bu məsələ sakinləri ciddi narahat edir.