“Şlyapa Zahid” 42 milyon manatlıq yeyinti ilə bağlı: Nəcməddin Sadıkov dedi ki, Fazil Məmmədov kömək edəcək

Müdafiə Nazirliyinin 24 milyon 234 minlik mənimsəmədə ittiham olunan sabiq zabiti Zahid Niftəliyevin (Şlyapa Zahid) növbəti məhkəmə prosesi keçirilib.

“Report” xəbər verir ki, Bakı Ağır Cinayətlər Məhkəməsində hakim Novruz Kərimovun sədrliyi ilə keçirilən prosesdə hakim təqsirləndirilən şəxsə ifadə verməyi təklif edib.

Zahid Niftəliyev bildirib ki, təqaüdə çıxandan sonra Müdafiə Nazirliyində mülki şəxs kimi çalışıb:

"Bir gün Baş Qərargah rəisinin otağındaydım. Mənə dedi ki, şirkət yaradıb müvafiq bir işi həll etmək lazımdır. Baş Qərargah rəisi Vergilər naziri Fazil Məmmədovun bu işdə bizə kömək edəcəyini dedi və məni nazirliyə göndərdi. Mənim təklif etdiyim şirkətə baxdıqdan sonra adıma yeni şirkət açdılar. Mənim ondan sonra şirkətlə əlaqəm qalmadı. Yalnız sənədləri imzaladım”.

Təqsirləndirilən şəxs qeyd edib ki, mərhum nazir Fazil Məmmədov işdən çıxandan sonra xeyli kredit borcu olduğundan xəbər tutub:

“Mənim üstümdən oyun oynayıblar, pulu mənimsəyiblər. 42 milyon manat pul adıma götürülüb. Bilmirəm bu pullar kimə çatıb. Mənə o puldan qara qəpik çatmayıb”.

Suallara cavab verən Zahid Niftəliyev deyib ki, cəmi bir dəfə bu işlə bağlı banka gedib:

“Pulun məbləğindən xəbərim olmayıb, bir dəfə gedib qol çəkmişəm”.

Prosesin qalan hissəsinin qapalı keçirilməsi təklif olunub və vəsatət təmin edilib.

Növbəti proses noyabrın 6-da davam edəcək.

Qeyd edək ki, Z.Niftəliyev iki il əvvəl rüşvət alma ittihamı ilə həbs edilib. Daha sonra o, azadlığa buraxıldıqdan sonra Dövlət Təhlükəsizliyi Xidməti (DTX) tərəfindən yenidən həbs edilib.

Gəncə Apellyasiya Məhkəməsi prokurorun Tərtər Hərbi Məhkəməsinin hökmündən verdiyi protesti təmin edərək Z.Niftəliyevi vəzifə saxtakarlığında və külli miqdarda rüşvət almaqda təqsirli bilib və o, 8 il 6 ay azadlıqdan məhrum olunub.

Bundan başqa, Zahid Niftəliyev "Atabank ASC"dən götürdüyü 42 milyon manat kredit vəsaiti və dövlət rüsumunun ödənilməsi ilə bağlı çıxarılmış Bakı Apellyasiya Məhkəməsinin qətnaməsini qərəzli icra etməyib.

Qeyd edək ki, Z.Niftəliyev Azərbaycan Ordusunun sabiq Baş Qərargah rəisi Nəcməddin Sadıkovun yaxın adamı olub.

Onu da qeyd edək ki, xüsusilə külli miqdarda mənimsəmə cinayətində iştirakı araşdırılan digər şəxslərlə bağlı DTX-də cinayət işi ayrılıb.