Mağazadan 30 min manatlıq quldurluq etməkdə təqsirləndirilən şəxsin məhkəməsi başlayır

Bakıda mağazadan 30 min manatlıq quldurluq etməkdə təqsirləndirilən Elnur Əmənovun məhkəməsi başlayır.

"Report" xəbər verir ki, iş baxılması üçün Bakı Ağır Cinayətlər Məhkəməsinə göndərilib və hakim Mahmud Ağalarovun sədrliyi ilə araşdırılacaq.

Məhkəmənin hazırlıq iclasının vaxtı hələlik məlum deyil.

Qeyd edək ki, hadisə ötən ilin noyabrında Qaradağ rayonunda yerləşən "Sədərək" ticarət mərkəzində qeydə alınıb.

Belə ki, E.Əmənov sahibkar Şakir Ağayevin başına dəmir alətlə xəsarət yetirib. O, mağazadan 30 min manat pul götürərək qaçıb.

E.Əmənova qarşı Cinayət Məcəlləsinin 181.3.3-cü (quldurluq, zərərçəkmiş şəxsin sağlamlığına ağır zərər vurulmaqla törədildikdə) maddəsi ilə ittiham olunub.