"Yuventus" Aaron Remsi ilə müqavilə bağlayıb

Bakı. 11 fevral. REPORT.AZ/ Turin "Yuventus"u öz rəsmi saytında London "Arsenal"ının yarımmüdafiəçisi Aaron Remsi ilə müqavilə bağladığını elan edib.

“Report” xəbər verir ki, uelsli futbolçu 1 iyul 2019-cu il tarixindən Turin komandasının oyunçusu olacaq. Həmin tarixdə onun ingilis klubu ilə müqaviləsinin vaxtı bitəcək.

KİV-in məlumatına görə, Remsinin Turin klubunda illik maaşı 23 milyon avrodan çox olacaq. "Arsenal" futbolçunu komandada saxlamağa çalışsa da, onu əmək haqqı ilə bağlı razı sala bilməyib.

İyirmi səkkiz yaşlı yarımmüdafiəçi cari mövsümdə İngiltərə klubunda milli çempionatda 22 oyun keçirib və iki qol vurmaqla yanaşı, 6 məhsuldar ötürmə edib. Eləcə də, onun hesabında Avropa Liqasında üç oyun və bir qol var.