Rusiya Premyer Liqasında çıxış edən “Axmat”ın baş məşqçisi dəyişib

İqor Şalimov futbol üzrə Rusiya Premyer Liqasında çıxış edən “Axmat” komandasına baş məşqçi təyin olunub.

“Report” xəbər verir ki, bu barədə Qroznı təmsilçisinin prezidenti Maqomed Daudov şəxsi “Instagram” səhifəsində yazıb. 50 yaşlı mütəxəssis bu postda dünən XI turda səfərdə “Soçi”yə 0:2 hesablı məğlubiyyətdən sonra istefaya göndərilən Rəşid Rəhimovu əvəzləyib.

Qeyd edək ki, son iş yeri “Ximki” olan Şalimov daha öncə “Uralan” və “Krasnodar”a rəhbərlik edib. “Axmat” hazırda 9 xalla 15-ci sıradadır və sonuncu yerdəki “Tambov”u 1 xal qabaqlayır.