Ronaldunun derbidən əvvəl ölkəsinə getməsi narazılığa səbəb olub

"Mançester Yunayted"in futbolçusu Kriştianu Ronaldunun "Mançester Siti"yə qarşı İngiltərə Premyer Liqasının XXVIII tur oyunundan əvvəl verdiyi qərar klub rəhbərliyini və futbolçuları təəccübləndirib.

"Report" “The Athletic” nəşrinə istinadən xəbər verir ki, 37 yaşlı hücumçu derbidə iştirakı etməyəcəyi dəqiqləşən kimi Portuqaliyaya yollanıb.

Təcrübəli forvard ilin əvvəlindəki zədəsinin təkrarlandığını bildirib. Zədəli oyunçuların matçlara getməsi tələb olunmur, lakin Ronaldunun bu addımı ciddi narazılığa səbəb olub.

Digər futbolçular portuqaliyalı hücumçunun stadionda olmasının komandaya fayda verə biləcəyinə inanırlar.

Qeyd edək ki, qarşılaşma "Mançester Siti"nin 4:1 hesablı qələbəsi ilə yekunlaşıb.