“Real” “Leqanes”i darmadağın edib və “Barselona” ilə xal fərqini azaldıb

“Real” İspaniya La Liqasının XIV turunda səfərdə “Leqanes”i darmadağın edib və “Barselona” ilə aradakı xal fərqini azaldıb.

“Report” xəbər verir ki, Leqanesdəki “Munisipal de Butarke” stadionunda keçirilən qarşılaşmanı Xavyer Alberola Roxas idarə edib.

43-cü dəqiqədə “Real”ın hücumçusu Kilian Mbappe hesabı açıb. 66-cı dəqiqədə yarımmüdafiəçi Federiko Valverde “Kral klubu”nun üstünlüyünü artırıb. Oyunda son nəticəni 86-cı dəqiqədə yarımmüdafiəçi Cud Bellinqem müəyyənləşdirib – 3:0.

13 oyundan sonra “Real” La Liqanın turnir cədvəlində 30 xalla ikincidir. “Leqanes” 14 oyundan sonra 14 xalla 14-cü yerdədir. Zirvədə 34 xalla Kataloniya təmsilçisi “Barselona” qərarlaşıb.