“Qarabağ”ın rəqibi futbolçusunu “Ayaks”a satıb

“Qarabağ”ın UEFA Avropa Liqasının qrup mərhələsində rəqibi olan Norveçin “Molde” klubu futbolçusu Sivert Mannsverki Niderland nəhəngi “Ayaks”a satıb.

“Report” xəbər verir ki, klub bu barədə rəsmi saytı vasitəsilə məlumat yayıb.

Bildirilib ki, 21 yaşlı yarımmüdafiəçinin “Ayaks”a transferi üçün klublar razılığa gəliblər. Mannsverk “Molde”də keçirdiyi son iki ildə 55 oyunda iştirak edib, 4 qol vurub.

Qeyd edək ki, “Qarabağ” Avropa Liqasının H qrupunda “Molde” ilə yanaşı, Almaniya təmsilçisi “Bayer 04” və İsveç klubu “Hakken” ilə mübarizə aparacaq.