Premyer Liqa: "Sabah" səfərdə "Turan Tovuz"u məğlub edib

Futbol üzrə Azərbaycan Premyer Liqasında XIII turun daha bir oyunu keçirilib.

"Report" xəbər verir ki, günün ikinci matçında "Turan Tovuz" "Sabah"ı qəbul edib.

Qarşılaşma paytaxt təmsilçisinin 3:2 hesablı qələbəsi ilə yekunlaşıb. Meydan sahiblərinin qollarını 35-ci dəqiqədə penaltidən Fərid Nəbiyev, iki dəqiqə sonra Bruno Qonçalves vurub. Qonaqların heyətində 8, 26 və 42-ci dəqiqələrdə Davit Volkov fərqlənməklə het-trik müəllifi olub.

Bu nəticədən sonra xallarının sayını 16-ya çatdıran "Sabah" 7-ci pilləyə yüksəlib. 15 xalı olan Tovuz klubu 8-ci sıraya enib.

Qeyd edək ki, günün ilk görüşündə "Sumqayıt" səfərdə "Neftçi"yə qalib gəlib - 2:1. Turun “Zirə” – “Qəbələ” və “Qarabağ” – “Səbail” oyunları noyabrın 12-də gerçəkləşəcək. Ötən gün açılış matçında "Kəpəz" səfərdə "Araz-Naxçıvan"ı minimal hesabla üstələyib - 1:0.