KİV: PSJ “Liverpul”un futbolçusuna həftəlik 500 min avro məbləğində müqavilə təklif edir

Fransanın “Pari Sen-Jermen” (PSJ) klubu İngiltərənin “Liverpul” komandasının misirli hücumçusu Məhəmməd Salaha həftəlik 500 min avro məvacib ilə üçillik müqavilə təklif edir.

“Report” xəbər verir ki, bu barədə “Eurosport”un jurnalisti Romen Kolle Qoden sosial şəbəkədə yazıb.

Hücumçunun “qırmızılar”la hazırkı müqaviləsinin müddəti 2025-ci ilin yayında başa çatır. Mənbənin məlumatına görə, Mersisayd təmsilçisi həftəlik 400 min avro maaş ilə ikiillik yeni müqavilə təklif etməyə hazırdır.

32 yaşlı Salah 2017/2018 mövsümündən “Liverpul”un şərəfini qoruyur. O, komanda ilə İngiltərə çempionu, İngiltərə Liqa Kuboku, İngiltərə Kuboku və Superkubokunun qalibi, Çempionlar Liqasının qalibi, UEFA Superkuboku və klublararası dünya çempionatının qalibi olub. Premyer Liqanın cari mövsümündə Salah 18 oyunda 17 qol vurub və 13 məhsuldar ötürmə edib. Onun komandası turnir cədvəlinin şəriksiz lideridir.