"Barselona"nın futbolçusu kuryoz hadisə nəticəsində zədələnib

İspaniya "Barselona"sının futbolçusu Rafinya kuryoz hadisə nəticəsində zədələnib.

"Report"un "Mundo Deportivo" nəşrinə istinadən məlumatına görə, hadisə Kataloniya təmsilçisinin evdə İngiltərənin "Mançester Yunayted" klubu ilə 2:2 hesablı heç-heçə etdiyi UEFA Avropa Liqasının pley-off mərhələsinin ilk oyunu zamanı baş verib.

Matçda qol və məhsuldar ötürmə ilə yadda qalan 27 yaşlı vinger 82-ci dəqiqədə əvəzlənib. O, baş məşqçi Xavi Ernandesin qərarına etiraz əlaməti olaraq, içkilərin saxlanıldığı soyuducunu təpikləyib və dizindən yüngül xəsarət alıb.

Qeyd edək ki, "Barselona" İngiltərədə "Mançester Yunayted"ə 1:2 hesabı ilə uduzaraq iki oyunun nəticəsinə əsasən avrokuboklarla vidalaşıb.