Azərbaycan millisinin Estoniya ilə matç üçün heyəti: Ən çox və ən az oynayanlar – ARAŞDIRMA

AVRO-2024-ün seçmə mərhələsində Estoniya ilə oyun üçün Azərbaycan millisinə çağırılan futbolçuların 2022/2023 mövsümündə Premyer Liqada keçirdikləri oyun sayı müəyyənləşib.

“Report”un araşdırmasına görə, yığmaya daxili birincilikdən dəvət edilən 22 oyunçu arasında ən stabili kapitan Emin Mahmudovdur.

31 yaşlı yarımmüdafiəçi çempionatın 36 matçının hamısında iştirak edib. “Qarabağ”ın heyətində 22 qolla Premyer Liqanın bombardiri olan Ramil Şeydayev cəmi bir qarşılaşmanı buraxıb. “Sabah”ın üzvləri Aleksey İsayev, Amin Seydiyev və “Zirə”nin oyunçusu Qismət Alıyev 34 matçda meydanda olublar.

Millinin baş məşqçisi Canni De Byazi bəzi oyunçuları dəvət etdiyi üçün yenə tənqid obyektinə çevrilib. İtaliyalı mütəxəssisin, xüsusən də, Azər Salahlı, Namik Ələskərov, Filip Ozobiç, Toral Bayramov və Höccət Haqverdi kimi oyunçuları çağırması birmənalı qarşılanmayıb.

Məsələn, Ozobiç 20 görüşdə iştirak edib ki, onda da cəmi 841 dəqiqə meydanda olub. Həmçinin, adları sadalanan digər futbolçular da ötən mövsüm klublarında müntəzəm iştirak edə bilməyiblər.

Milli üzvləri arasında 2022/2023 mövsümündə ən az görüşə çıxan futbolçu Şahruddin Məhəmmədəliyevdir. “Qarabağ”ın qapıçısı zədə səbəbindən Premyer Liqanın cəmi 11 matçında çərçivəni qoruyub.

Qeyd edək ki, siyahıda yalnız ölkə daxilində çıxış edən futbolçular yer alıblar. Yığmaya legioner həyatı yaşayanlardan yalnız Anton Krivotsyuk (“Daejon Hana”, Cənubi Koreya), Renat Dadaşov (“Qrasshopper”, İsveçrə) və Mahir Emreli (“Konyaspor”, Türkiyə) çağırılıblar.