Azərbaycan karateçisi Fransada gümüş medal qazanıb

Bakı. 30 yanvar. REPORT.AZ/ Fransanın paytaxtı Parisdə karate üzrə Premyer Liqa seriyasından ilk  yarış keçirilib. Azərbaycan Milli Karate Federasiyasından (AMKF) "Report"a verilən məlumata görə, yığma komandanın üzvü İrina Zaretska 68 kq çəki dərəcəsində gümüş medal qazanıb.

67 kq-da çıxış edən Niyazi Əliyev isə bürünc medal uğrunda son təsəlliverici görüşdə qələbəni əldən verib.

Maliyyə çətinliyi səbəbindən Dünya Karate Federasiyasının (WKF) nüfuzlu turnirlər seriyasından olan Premyer Liqada Azərbaycan millisinin yalnız bir neçə üzvü iştirak edib. Onlardan Roman Heydərov (kata) səhhətində yaranan problemlə əlaqədar, 84 kq-da Sərxan Quluzadə isə zədə üzündən mübarizəni davam etdirə bilməyiblər.

Qeyd edək ki, AMKF prezidenti və WKF-nin Texniki Komitəsinin üzvü Yaşar Bəşirovun rəhbərliyi ilə Fransaya yollanan heyətdə beynəlxalq dərəcəli hakimlər Yusif Məmmədov və Anar Allahverdiyev də yer alıb.