SOCAR III rübdə neft hasilatını artırıb

Bu ilin iyul-sentyabr aylarında Azərbaycan Dövlət Neft Şirkəti (SOCAR) tərəfindən 1 milyon 967 min 597 ton neft, 1 milyard 987 milyon 970 min kubmetr təbii qaz hasil olunub.

Bu barədə “Report” SOCAR-ın 2023-cü ilin üçüncü rübünə dair qazma, hasilat, emal və ixrac göstəriciləri ilə bağlı açıqlamasına istinadən xəbər verir.

Əvvəlki ilin eyni dövrü ilə müqayisədə SOCAR tərəfindən neft hasilatı 0,4 % artırılıb, qaz hasilatı isə 2 % azaldılıb.

Ölkə üzrə ümumilikdə 7 milyon 539 min 673 ton neft və 12 milyard 009 milyon 190 min kubmetr qaz hasil edilib. Ümumilikdə ölkə üzrə neft hasilatı 2022-ci ilin müvafiq dövrü ilə müqayisədə 5,9 % azalıb, təbii qaz hasilatı isə 9,4 % artıb.