"SOCAR AQŞ" Qara dəniz sahələrinin işlənilməsində iştirak edəcək

“Naftoqaz Ukrayna” Milli Səhmdar Şirkəti bir sıra xarici şirkətlərlə Anlaşma Memorandumları imzalayıb.

“Report”un Ukraynanın Sənaye Nazirliyinə istinadən verdiyi məlumata görə, anlaşma memorandumu imzalanan şirkətlər arasında Birləşmiş Ərəb Əmirliklərinin “Dragon Oil”, ABŞ-ın “Helmerich&Payne, Inc.” ("H&P") və “3 Seas Energy”, həmçinin Azərbaycanın "SOCAR AQŞ" şirkətləri də var. Sənədlərin imzalanması Ukrayna Qaz İnvestisiya Konqresi çərçivəsində baş tutub.

Məlumatda deyilir ki, bu memorandumlar Qara dəniz sahələrinin və sıx süxurların qaz yataqlarının işlənməsi, eləcə də tükənmiş yataqlarda istehsalın səmərəliliyinin artırılması kimi yeni strateji layihələr çərçivəsində planlaşdırılan ortaqlıqların əsasını təşkil edir”.

Qazma və quyu tikintisinin idarə edilməsi üzrə inteqrasiya edilmiş şirkət olan "SOCAR AQŞ" ilə imzalanan memorandum həmçinin Qara dəniz sahillərinin inkişafı sahəsində əməkdaşlığı nəzərdə tutur. Şirkət Xəzər dənizində dəniz qazma işlərində böyük təcrübəyə və özünün dənizdə qazma donanmasına malikdir.

"SOCAR AQŞ"nin Baş direktoru Samir Mollaev bildirib ki, bu əməkdaşlıq Ukraynada karbohidrogenlərin kəşfiyyatı və hasilatı sahəsində perspektivlərin birgə qiymətləndirilməsi, təcrübə, bilik və texnologiyaların mübadiləsi üçün işgüzar əlaqələrin inkişafı üçün yeni imkanlar açır.

"Naftogaz"ın İdarə Heyətinin rəhbəri Yuriy Vitrenko şirkətin planlarını şərh edərkən bildirib ki, şirkətin yataqlarının ümumi potensialının 600 milyard kubmetr qaza çatıb: “Önümüzdəki illər üçün planlarımıza Qara dənizdə yeni sahələrin kəşfiyyatı və işlənməsi, sıx və dərin qaz yataqlarının işlənməsi daxildir. Bu təşəbbüslərin həyata keçirilməsi üçün 20 milyard ABŞ dollardan çox sərmayə, habelə hələlik Ukraynada lazımi səviyyədə inkişaf etməyən müasir texnologiyalar lazımdır. Bunun üçün də planlarımızı səmərəli və tez həyata keçirmək üçün tərəfdaş və investor cəlb etmək bizim üçün vacibdir”.

Xüsusilə, “Naftogaz” Qara dəniz sahələrinin kəşfiyyatı və işlənməsi sahəsində “Dragon Oil” ilə əməkdaşlıq etməyi planlaşdırır. Şirkətdə qeyd edirlər ki, “Dragon Oil” 20 ildir Türkmənistan hökuməti ilə hasilatın pay bölgüsü müqavilələri əsasında Xəzər dənizində fəaliyyət göstərir və bu müddət ərzində onun işlənilməsinə təxminən 7 milyard ABŞ dolları sərmayə qoyub.

“3 Seas Energy” və “H&P” ilə əməkdaşlığın bütün Ukraynada sıx su kollektorlarının inkişafına yönəldilməsi planlaşdırılır. “3 Seas Energy” Məhsul Təkmilləşdirmə Müqaviləsi (PEC) çərçivəsində artıq tükənmiş yataqların inkişaf səmərəliliyinin artırılmasına kömək edəcək. Öz növbəsində, dünyanın ən böyük qazma şirkəti olan H&P “Naftogaz”ın daxili qazma podratçısı “Ukrburgaz” şirkətinin işinin səmərəliliyinin artırılmasına kömək edə biləcək.

Qeyd edək ki, "Naftogaz Ukrayna” qarşıdakı on ildə təbii qaz hasilatını indiki təxminən 13 milyard kubmetrdən 1,8 dəfə artıraraq 24 milyard kubmetrə qədər çatdırmağı qarşısına qoyub.