Norveçin Rifah Fondu RWE-dən iki külək stansiyasının 49 % payını alıb

Norveçin Rifah Fondu 1,4 milyard avroya (1,52 milyard ABŞ dolları) Almaniyanın “Rheinisch-Westfälisches Elektrizitätswerk” (RWE) şirkətindən Danimarka və Almaniyada tikilməkdə olan iki dəniz külək stansiyasının səhmlərinin 49 %-ni alıb.

“Report” “Reuters”ə istinadən xəbər verir ki, bu, fondun Almaniyanın enerji şirkəti ilə ilk belə müqaviləsidir.

Fondun külək elektrik stansiyalarının tikintisindəki payının alınması və maliyyələşdirilməsinə ümumi investisiyası 4 milyard avro həcmində qiymətləndirilir.
Sözügedən layihələr gücü 1 080 meqavat (MVt) olan Danimarkadakı “Thor” dəniz külək stansiyası və gücü 1 560 MVt olan Almaniyadakı “Nordseecluster” layihəsidir.

2020-ci ildən Norveç parlamenti fondun inkişaf etmiş bazarlarda yerləşəcəyi təqdirdə, bərpa olunan enerji mənbələri sferasında kotirovkalı olmayan layihələrə investisiya qoymasına icazə verib.