Azərbaycandan ixrac olunan elektrik enerjisinin təxminən 50 %-i Gürcüstanın payına düşür

Bu ilin yanvar-aprel aylarında Azərbaycan Gürcüstana elektrik enerjisi ixracını ötən ilin müvafiq dövrü ilə müqayisədə 69,6 % azaldıb.

Bu barədə “Report”a Dövlət Statistika Komitəsindən məlumat verilib.

Bu dövrdə Azərbaycandan Gürcüstana 414 milyon 183 min kilovat/saat elektrik enerjisi tədarük edilib.

Dəyər ifadəsində bu tədarüklər 2023-cü ilin müvafiq dövrü ilə müqayisədə 75,3 % azalaraq 20 milyon 861,08 min ABŞ dolları təşkil edib.

Azərbaycandan enerji axınının ümumi həcmində Gürcüstanın payı 48,4 % təşkil edib.

2024-cü ilin yanvar-aprel aylarında Azərbaycandan ümumiyyətlə 47 milyon 640,25 min ABŞ dolları (84,8 % az) dəyərində 856 milyon 185,78 min kilovat/saat (69,4 % az) elektrik enerjisi ixrac olunub. Eyni zamanda 4 ölkəyə elektrik enerjisinin tədarükü həyata keçirilib: Gürcüstan, İran, Türkiyə və Rusiya. TOP 3-ə Türkiyə, Gürcüstan və Rusiya daxildir.

Hesabat dövründə Gürcüstandan Azərbaycana elektrik enerjisi idxalı 912,75 min ABŞ dolları (10,2 dəfə çox) dəyərində 14 milyon 042,37 min kilovat/saat (10,2 dəfə çox) təşkil edib. Azərbaycanın elektrik enerjisi idxalının ümumi həcmində Gürcüstanın payı 25,3 % təşkil edib.