Azərbaycan ötən il magistral neft kəmərlərindən əldə etdiyi gəliri açıqlayıb

Ötən il Azərbaycan Bakı-Tbilisi-Ceyhan (BTC) əsas ixrac boru kəməri daxil olmaqla magistral neft kəmərlərinin fəaliyyətindən 1 milyard 58 milyon 72,5 min manat (cari məzənnə ilə 622,4 milyon ABŞ dolları) gəlir əldə edib.

Bu barədə “Report”a Dövlət Statistika Komitəsindən məlumat verilib.

Məlumata görə, bu, 2023-cü ilin göstəricisi ilə müqayisədə 4 % azdır.

2024-cü ildə magistral neft kəmərləri şəbəkəsində itkilər 2023-cü ildəki 3,8 min tonla müqayisədə 18,4 % artaraq 4,5 min ton təşkil edib.

Xatırladaq ki, hesabat ilində magistral neft kəmərləri ilə 38 milyon 752,1 min ton neft nəql olunub ki, bu da 2023-cü ilin göstəricisi ilə müqayisədə 2,5 % azdır. Nəqlin ümumi həcmində təxminən 76 % BTC-nin payına düşüb.